A CHOUSA, CHANZOS POSITIVOS
A ACDeM Armadiña valora moi positivamente a aprobación por unanimidade da desafectación da contorna da Chousa.
No pleno realizado o martes no Concello de Poio, aprobouse a iniciativa presentada pola ACDeM Armadiña, para a cal contamos co apoio de a Comunidade de Montes Rega dos Agros de Combarro, A Solaina e Mare Podium.
Primeiro queremos agradecer aos tres grupos municipais BNG, PP e PSOE e a concelleira non adscrita Silvia Díaz o voto favorable á moción presentada para a desafectación da contorna da Chousa. É a primeira vez que o noso colectivo realiza este tipo de acción e estamos sumamente contentos do apoio recibido.
O martes puidemos comprobar os informes realizados nestes meses pola equipa de goberno, valorámolos moi positivamente e considerámolos serios e rigorosos. Cremos que dende onte a Chousa está máis preto da veciñanza mais somos conscientes da complexidade administrativa que aínda queda.
O Concello de Poio reunirase nos próximos días con Portos de Galicia, agardamos con ansia esa reunión e non entenderíamos un novo aprazamento por parte da entidade autonómica, xa que dende a delegación territorial de Costas do Estado, transmitiron a súa vontade de remitir favorablemente ao ministerio o expediente da desafectación.
Consideramos os primeiros chanzos positivos, mais seguiremos vixiantes para que as administracións axilicen os trámites e a Chousa pertenza canto antes os veciños e veciñas de Poio.
